सभामुख यादवले आफू सदनका कामरकारवाही कुराकानी गर्न भन्दै मन्त्री विजयकुमार यादवको कार्यकक्षमा गएको बेला सचिव झा पनि आइपुगेका र मन्त्री यादवले एक छिन पछि आउन निर्देशन दिएका सभामुख यादवले बताए । मन्त्रीको निर्देशनअनुसार सचिव झा बाहिरिए पनि एकछिनमै फेरि भित्र आएर ‘मेरो कुरा नसुन्ने, सुन्नुस्’ भन्दै मन्त्री यादवसँग जिद्धि गर्न थालेको सभामुख यादवको भनाइ छ ।
तर, सचिव झाले भने ‘वन उद्यम कार्यक्रम’ मन्त्री यादवले आफ्नो मान्छेको एनजीओलाई दिनु पर्यो भन्दै दवाव दिएका र मन्त्रीको दवावअनुसार आफूले काम नगर्दा आफूमाथि हातपात भएको बताएका छन् ।
त्यस्तै मन्त्री यादवले सभामुखको अगाडि आएर थच्चक बसेको, मर्यादाक्रम मिचेका लगायतका गल्ती सचिवकै भएको तर, आफूले कुटपिट नगरेको बताएका छन् ।
मन्त्री यादव र सचिव झाबीच झगडा हुँदा मन्त्रीकै कार्यकक्षमा रहेका राजपा नेपालका सांसद उपेन्द्र महतोले मन्त्री र सचिवबीच हात हालाहालको स्थिति सिर्जना भएको बताए ।
सभामुख यादव र आफूले मिलेर दुवैजनालाई शान्त पारेको महतोले लोकान्तरसँग बताए ।
दुवैजनाबीच हात हालाहालको स्थिति सिर्जना भएपनि मन्त्रीले कुटपिट नगरेको सांसद महतोले दावी गरे । ‘मन्त्री र सचिबबीच हात हालाहालकै स्थिति सिर्जना भएको हो । तर मन्त्रीले कुटपिट गर्नुभएको हैन,’ महतोले भने, ‘पछि सभामुख ज्यू र मैले मिलेर उहाँहरुलाई शान्त पार्यौं ।’
छानबिन समिति गठन
प्रदेश २ सरकारले सचिव कुटिएको विषयमा छानबिन गर्न ३ सदस्यीय छानबिन समिति नै गठन गरेको छ । आन्तरिक मामिला तथा योजना मन्त्री ज्ञानेन्द्र यादवको नेतृत्वमा गठित समितिमा आन्तरिक मामिला तथा योजना मन्त्रालयका सचिव र मुख्यमन्त्री तथा मन्त्रिपरिषद कार्यालयका सचिव सदस्य छन् ।
मुख्यमन्त्री लालबाबु राउतले समितिले प्रतिवेदन बुझाएपछि मात्रै कारबाही प्रक्रिया अगाडि बढाउने जनाएका छन् । मुख्यमन्त्री राउतले आइतवार मन्त्री यादव र सचिव झासँग छुट्टा छुट्टै भेटेर घटनाबारे जानकारी लिएका छन् ।

मन्त्री यादवले भने, – “कत्तै न कत्तै संघीयतालाई फेल गर्नको लागि यस्ता षडयन्त्रहरु रचिदैछ प्रदेश २ को सरकार उपर । भनाभन भएपछि नै केही मिनटमै केही पत्रकारहरुको समूह नै आउनु भनेपछि यी घटना सुनुयोजित जस्तो देखिएकोले संघीयता फेल गर्न षडयन्त्र भएको हुनुपर्छ । कार्यालयमा हल्ला भएको दुई मिनेटमै कसरी र कहाँबाट आए त्यतिका पत्रकारहरु ? शंका त त्यहाँ उब्जिएको छ । तर, सचिव विद्यानाथ झालाई चैँ उपचारको जरुरी छ ।”

यसअघि पनि सचिव झाको विगतका व्यवहारहरुलाई मध्यनजर गर्दै मन्त्री यादवले उनलाई प्रदेश सरकारले नै उपचार गराउनुपर्ने बताएका छन् । छानबिन समिति गठन भएपछि यस प्रकरण बारे छानबिनको निष्कर्ष निकाल्ने मन्त्री यादवले थपे ।